Wednesday, May 25, 2016

శ్రీ కష్టే ఫలే వారికి వివాహ దిన వార్షికోత్సవ శుభ సందర్భం గా - 'వడి యాలు' - 'కండ' కావ్యం !

శ్రీ కష్టే ఫలే !- వడియాలు - 'కండ' కావ్యం !
 
బ్లాగ్ గాంధీ కాలక్షేపం కబుర్లు శ్రీ  శర్మ గారు,
 
మీ మే ఇరవై అయిదు తారీఖు  తారీఫ్ :)

మీ జీవితం లో 'బంగారం' మీ శ్రీమతి ప్రవేశించిన దినం ఇవ్వాళ (సరియనే అనుకుంటాను!)
ఇది సరిగ్గా ఓ యాభై నాలుగు సంవత్సరాల మునుపు జరిగినట్టు మీ బ్లాగ్ లో చదివి నట్టు గుర్తు.
సో , మీ కిదే , యాభై నాలుగు వసంతాల గ్రీటింగ్స్!
మీ జీవితం అమోఘం. మీ జీవితం లో జరిగిన సంఘటన ల ఆధారం గా మీరు బ్లాగ్ లో సహృదయులై    మీ జీవిత అనుభవాలను టపాల ద్వారా   పదుగురి తో పంచుకోవడం, తద్వారా మీరు పదిమందికి మార్గదర్శకులు గా ఉండడం ఈ పంచ దశ లోకం లో జరిగిన అపురూప విశేషం.
ఈ సందర్భం గా మా గురువులుంగారు శ్రీ శ్రీ పాద వారి చలువ గా మీ వడియాల టపా  స్ఫూర్తి గా 'కండ' కావ్యం సమర్పయామి :)


శ్రీ కష్టే ఫలే బ్లాగు లోని వడియాల టపా ఈ 'కండ' కావ్యానికి స్పూర్తి !

****

కష్టే ఫలే -వడియాలు -'కండ' కావ్యం !
---------------------------------
 
బండగ గాడిద గంపెడు
తిండియు వోలెన్ తినంగ దిటవు గలుగునా !
నిండుగ, చూపుకు బాగగు,
మెండగు, రుచికర జిలేబి మేలిమి, వలయున్ !  
 
కండలు ఊరక పెంచిన
దండగ ! మేధా జిలేబి ధారణ వలయున్
గుండెలు తీసిన బంటుకు
దండము  వేయ మనిషికి నిదానము వలయున్ !
 
గ్లాసెడన కొట్టు పిండి
ధ్యాసగ నుప్పు జిలకరయు తగు కారములున్
ఆ సెగ నెసరున నీళ్లున్ 
ఆశగ  బెట్టె నిట నొజ్జ మాచన జూడన్
 
మరియొక గ్లాసెడు నీళ్ళన
నురగగ  పిండిని గలుపుము ఉండలు గాకన్
మరిగిన నీళ్ళన పోయుడు
సరిసరి కారపు దినుసును చక్క గలుపుమా !
 
దరి నుండుము సరి కలుపుము
మరి యుండలు కట్టక మరిమరి కలుపవలెన్
సరి జూచి గరిట జారుగ
తిరికగ  ముద్దయునుగాక దించు జిలేబీ!
 
యిదియొక కళ !సాఫ్టుస్కి
ల్లిది!  తెలుసుకొను వడియాల లీలను గను!స
న్నదయిన తడిబట్టను పిం
డదగును ! ఎండన పరిచి బడయ వలయు గనన్ ! 
 
నాలుగు పక్కల రాళ్ళను
వీలుగ, బట్ట యెగురకను, వేగిర  నిడుమా !
గోలుగ ఉడికిన పిండిని
వాలుగ పెట్టుకుని వెళ్ళవలెను జిలేబీ !
 
ఎండల వాటుగ వడియం
ఎండును, మధ్య తడిపచ్చి ఎంచక మరు నా
డెండన నిడుమా వాటిన్
మెండుగ యగునే  జిలేబి మేటి వడియముల్ !
 
ఆపై వాటిని తియ్యడ
మో? పై బట్టను వడియము మొత్తము లోనన్
కోపుగ ఉండునటుల జే
యన్! పై నీళ్ళచిలికి వడియాలను మీటన్ !
 
చకచక వచ్చును నొకటొక
టిగ, యొక  పళ్ళెము న యుంచు ! టీచరు జెప్పెన్ !
నికరముగ వడియముల మరి
యొక దినమున నెండ బెట్ట యోగ్యము వినుమా
 
చక్కగ నారగ వాటిని
టక్కని డబ్బా నిడవలె టపటప యనగన్ !
మిక్కిలి ముదము జిలేబీ !
చెక్కితి వీ కండ కావ్య చెణుకుల నిచటన్ ! 
 
శ్రీ మాచన వడియముల ట
పా మూలము గొని జిలేబి పద్యము గూర్చెన్ !
రామా ! ఆ దంపతులకు
నీ మాటగ యీ దినమున నిధియన నిత్తున్ !
 
 
శుభాకాంక్షల తో
చీర్సు సహిత
జిలేబి
 

12 comments:

  1. శర్మ గారికి, వారి సహధర్మచారిణి గారికీ వివాహదిన వార్షికోత్సవ శుభాకాంక్షలు.

    ReplyDelete
    Replies
    1. విన్నకోటవారు
      మీ అభిమానానికి
      మీ అభినందనకి
      ధన్యవాదాలు.

      Delete
  2. శర్మగారు చీర్స్..

    ReplyDelete
    Replies
    1. astrojoydగారు,
      అదే ప్రయత్నంలో ఉన్నామండి. :)
      మీ అభిమానానికి
      మీ అభినందనకి
      ధన్యవాదాలు.

      Delete
  3. మీరు వ్రాసేవి కొన్ని అర్థం అయ్యి, కొన్ని అర్థం కాక కొట్టుమిట్టాడుతున్న వాళ్ళల్లో నెనొకణ్ణి. శ్రీ శర్మ గారి గురించి మీరు మొదట్లో వ్రాసినవన్నీ అక్షరసత్యాలు. వారికి, వారిని వెన్నంటే అనుసరిస్తున్న సతిమణికి సమస్త ఆయురారోగ్యాలు, పరమేశ్వర కృప లభించాలని ఆ దేవదెవుణ్ణి ప్రార్థిస్తూ, వారు మాతరానికి అందిస్తున్న ఉపకారానికి కృతజ్ఞతలు తెలియచేస్తున్నాను. శుభం భూయాత్.

    ReplyDelete
    Replies
    1. durvasగారు,
      అమ్మవారు ఎప్పుడు అర్థమయ్యేరుగనక, ఏదొచ్చినా ఉప్పెనే :)
      మీ అభిమానానికి
      మీ అభినందనకి
      ధన్యవాదాలు.

      Delete
  4. చెక్కినావు కావ్యమొకటి
    చక్కిలాన వడియమెట్టి
    దక్కునేమొ గురువు కరుణ
    చిక్కునేమొ తన ఆదరణ

    గురువు గారికి శుభాకాంక్షలతో ...



    ReplyDelete
    Replies
    1. nmrao bandiగారు,
      మనలో మాటా, మీరుకూడా జిలేబిగారిలా తయారై పోతున్నారా ఏం? :)
      మీ అభిమానానికి
      మీ అభినందనకి
      ధన్యవాదాలు.

      Delete
    2. 'మీరుకూడా జిలేబిగారిలా తయారై పోతున్నారా ఏం?' ...
      గురువు గారూ మాతాశ్రీ గారితో నాకు సాపత్యమా?
      అంత విద్వత్తు, విద్యుత్తు రెండూ లేవు నా దగ్గర.
      ఏదో, ఆవిడ చేసే చమత్కారాలకు జస్ట్ సరదా జోడింపులు
      మాత్రమే సుమా. కేవలం స్వేచ్చా రచనం. మరో చోట అవి
      కనబడవని ఈ పాటికి గమనించే వుంటారు. అదో తు(సు)త్తి.
      :)

      Delete
  5. జిలేబిగారికి,
    అమ్మకి నమస్కారం.
    మేము మరచినదే ఈ 55 వివాహ వార్షికోత్సవ వేడుక. కారణం చెప్పుకున్నదే. మీరింత గుర్తు పెట్టుకుంటారనుకోలేదుస్మీ. ఒక అర్భకునికి, అనామకునికి ఇంత సన్మానం చేసిన తల్లికి మరొకసారి వందనం.

    పద్యాలు జిలేబి పాకానపడుతున్నాయి. ఇప్పుడిక రాశి తగ్గించి వాసి పెంచండి, ప్రయత్నం బాగుంది :)
    మీ అభిమానానికి
    మీ అభినందనకి
    ధన్యవాదాలు.

    ReplyDelete
  6. శర్మ గారి మీద ప్రేమతో రాసిన కలకండ కావ్యం ఇది - చప్పట్లు!!!

    ReplyDelete
  7. నిర్విరామంగా సాగుతున్న పద్యరచనా సాధనలో ప్రతి పద్యానికి ముగింపులో "వినుమా జిలేబీ" లాంటిదేదన్నా తగిలిస్తే "జిలేబీ శతకం" గా నిలిచిపోతుంది కదా, ప్రయత్నించండి జిలేబీ గారూ 👌

    ReplyDelete